#1
I KOSINANGAN DOT OTOPOT

Osinang-no it ulun dit amu mamanau sid umpug dit ulun dot araat om it amu mingkakat sid ralan dit ulun do kidusa,
Om it amu mogom sid umpug dit ulun do mamangagauk.
Inoi nga ozi iosido di Pinonuhuan do Kinoringan
Om i Pinonuhuan dino piohondom dau sodop adau.
Iosido dino iadnoko i puun do kazu di tinanom sid timbang do bavang.
Tu kodung orikot-no i koponguvaan, amu milo-milo nga monguva-no.
Om i roun dau nga amu lumondihu
Om nunu-nopo i gamaon dau, ajadi-nopo
Topot ong it ulun dot araat, okonko iadino.
Inoi nga iadko apol iosido, tu otilibi do barat.
Sabap it ulun dit araat dino amu katama mintoron sid Pinonuhuan dot avantang
Om it ulun do kisala, nga iadinoi. Amu katama mintoron sid umpug dit ulun dot abanal.
Tu elaani do Kinoringan i ralan dit ulun dot abanal dino.
Topot ong i ralan dit ulun dot araat dino, sid kotonusan o rikoton.

#2
I RAJA DI TUHAN

Nunu-ka i gulonggong dit ongobansa,
Nokokuro-ka, tu miuupakat ioti mongumba dit aso kanangan?
Sangakas-akas-no. it ongomangahatul do sompomogunan
Om it ongoulion, nga miahatul-no sumaap di Tuhan, Om i raja di nopili do Kinoringan. 
Boros dioti; Amu okoi-no mokiuripon vagu dioti dino, ka, om
Pututo tokou-no i babalud dioti di tokou, ka.
Kerak-no i raja do surga.
Goukon-no di Tuhan ioti.
Humungot iosido, mamajal dioti .
Om nokotigog-no ioti di boros di hungot Dau.
Ioku-no o minamangkat di raja-ku.
Iosido-no o mangahatul sid Sion, i burul-Ku dit osusi, ka.
Tarangon-ku-no i katatapo di Tuhan.
Minomoros-no iosido sid dohon dot; lkau dino anak-Ku:
Biano-no o kinapananganakan-Ku dikau.
Pokitahako-no sid Dohon it ongobansa
Om itahak-ku-ogi dot ipasanganu-Ku dikau i sokoviai it ongobansa sid pentongkop do'pomogunan.
Ombo-noko Ikau do muroko-Nu ioti di palad-Nu do basi.
Babako-no ioti iadko panding,
sid ulun di mangagama do kuron, ka di Kinoringan.
Sabap ino ot ongoraja, ponguog-kou banal dot aralom.
Osipo-no dikou i tudukan Dau, ot ongohakim di pomogunan.
Samba-kou-no sid Tuhan
Pongoguna-kou-no di kuasa Dau sampai pangarazou-kou-no Dau
lndozoho-no dikou it Anak Dau
Om amu-kou-ogi ohungatan-do katanus Dikou.
Tu oruhai i rodus Dau dino sumikit.
Topot osinang-rio it isai-nopo i mokiapad Dau.

#3
PINTADUWA DO SASARAP DO MOKITULUNG
! Zabur di Raja Daud i hiza di minogidu yosido antad sid di Absalom it anak dau do kusai.


O TUHAN, ginumu di sangod ku, banalko ogumu ot ulun do suma'ap dohon!
Yoti mongolupu sampai momoros dot,“I Kinoringan amu monulung di raja!” ka dioti.
Topot Ikau no o TUHAN, o kolig ku i mongolikup dohon. Ikau o pamanang dohon om poguli di kakansangan di ginavo ku.
Mongingkokodim oku di TUHAN mindamo do kotulungan om sid burul Dau dot osusi, nga timpa'on oku Dau.
Gumili oku, iri ogi kodop, om osuvaban i TUHAN mongolikup dohon.
Amu oku rumosi do rinibuvan ot ulun do suma'ap do mongolimput dohon i siombo nopo it inantadon.
Sopulai oku no o TUHAN i Kinoringan ku, hukumai no om ingkuguzai no i sokoviai i sangod ku.
I TUHAN o pamanang, harapon do mamarakat Yosido di bansa Dau.

#4
PIINTADUWA DO SODOP DO MOKITULUNG
! Bahagi di maangagazad do kuaya. Anggaton do gusapi. Zabur di Daud.

Timpa no ong kodung mongodim oku Dikau, Kinoringan i maangapad dohon! I hiza dot osusa oku di gulu, riumikot Ko monulung dohon. Biano sianai oku no, om iningo no i piintaduwa ku!
Ot ongoulun, songkuro kalaid do mongusiba kou dohon? Songkuro po ka kalaid do manamod kou dit aso guna, om mogihim do vudut?
Hondomo no do nokopomili no i TUHAN dit ulun dit atatap sid Dau do songonuvon Dau, om mongining i TUHAN ong kodung mongodim oku Dau.
I humungot kou, kadan no mangagama do sala. Uogo no i hal dino pivozo'on mozom, di hiza di mili-gili ko sid oodopon nu.
Pasambao no it isamba dot abanal, om pangasip no sid TUHAN.
Ogumu ot ulun mintaduwa dot,“O TUHAN tahakai okoi no do barakat do kilaba. Harapon dot ozi ko dahai,” ka.
Ikau no o pohigak di ginavo ku mantadko it ulun dit alaba do kaakanan om kenuman.
Sabap ino, gumili oku om modop dot osinang; O TUHAN, baiko Ikau ot ahatul o paanaud dohon.


#5
MINTADUWA DO MOKILIKUP

! Bahagi di maangazad do kuaya. Anggaton do suling. Zabur di Daud.

O TUHAN, iningo no it ongoboros ku om iningo no i homu ku.
O Kinoringan ku, Raja Ku,iningo no i gizak ku om tulungai oku no. Mintaduwa oku sid Dikau, O TUHAN;
hiza do sasarap, iningon Nu i dolou ku; i hiza di sumilau it addau, pasamba oku di piintaduwa ku, (parasamba'an ku.) om minud-inud dit ambat Nu.
O Kinoringan, Ikau dino amu engin di gagama'on tara'at; amu Ko pabanal dit ulun tara'at do sid tinoguvangon Nu.
Amu ko kogo'os mimot dit ulun dot asavat o ginavo, om asana Ko di sokoviai it ulun di maangagama dot ara'at.
Tonuson Nu i sokoviai it ulun dot ovudut, om usiba'on Nu it ulun dit oburongit om moomusing.
Topot gima tu i samod Nu dot agazo, kosuvang oku sid valai Nu. Kasamba oku sid Dikau sid saralom di valai Nu dot Osusi, om kosingkudou oku sumamba sid tinoguvangon Nu do mongohormat.
O TUHAN, banalko ogumu i sangod ku; gazado oku no mangagama di kenginan Nu, om potuduko no i ralan Nu i vaza'an ku.
It ongoboros di sangod ku amu ikaharap; tu i pi'itung dioti ara'at banal; it ongoboros dioti kopoluk, topot noponu dot ara'at o tomodon.
O Kinoringan, hukumo no yoti; posusao no yoti gima i netung dioti kondiri. Sunsubo no yoti sabap ogumu i kasala'an dioti, om susuma'ap yoti Dikau.
Harapon dot i sokoviai it ulun di sumunsud sid Dikau nga ohigak om mindolongoi dot otomon sampai penlaid. Likupai no yoti i manamod dikau, supaya banalko osinang yoti sabap Ikau.\fig 1,80,62 *Ongopakakas dot u'unizon (5:12)\fig*
O TUHAN, Ikau no o mamarakat dit ulun dot obinsuhut; samod Nu o mongolikup dioti do yadko kolig.

#6
POKITULUNGAN

Kada-oku-no sanao
Kada-oku-no onongo di rodus-Nu.
Sianai-oku-no o Tuhan, tu orukung-oku-no diti.
Pohijao-oku-no o Tuhan, tu mogkikip-no it ongotulang-ku.
Nopipitan-oku-no, songkuro-Ko-po kalaid o Tuhan.
Gulio-oku-no om sopulai-oku-no.
Sopulai-oku-no di samod-Nu.
Sabap ong apatai-oku-no, amu-oku-no kopongindazou Dikau.
Sabap sid umpug dit ongoulun do minatai sid naraka, aso-no monorima kaseh sid Dikau.
Mongohomu-oku-no, tu opupusan-oku do huzan.
Osusuvaban-oku-no mogihad,
Om ozopos-no do romou-ku it odopon-ku.
Mongkung-no i mato-ku dot koruol di ginavo-ku.
Lisunon-oku-no dinot ongosangod-ku.
Insoduai-oku-no dikou, ot ongoulun di mongindaradaat
Sabap norongou-no di Tuhan it ihad-ku.
Nening-no di Tuhan i gama-ku mokitulung
Om notorima-no Dau i gama-ku minta-dua.
Amalu-no kavi it ongosangod-ku
Om momodtangkus-no kavi ioti mogidu.

#7
PINTADUWA MINDAMO DO KOTIMBANGO
! I korudu di Daud i linongoi sid TUHAN gima i Kus it ulun do Benyamin minanala di Daud.

O TUHAN i Kinoringan ku, sumunsud oku sid Dikau; sopulai oku om polobuso oku no antad sid sokoviai it ulun di magasu dohon.
Kada no posimozo'o yoti di yadko mondou i manabpo om mangagazat dohon sid pomogunan dit iso ot ulun nga aso kapanapul dohon.
O TUHAN Kinoringan ku, ong kopipangagama oku dot ara'at, ong kisala iti palad ku,
antawa ong minangaraat oku sid ulun di kumiandus dohon, antawa minongorugi dit ulun di suma'ap dohon dot aso pavaza'an,
ipagasu oku no di sangod ku do sampai atabpa'an di sangod ku, om iri ogi ipapatai oku om yopung oku sid avu!
O TUHAN, ingkakat no do humungot, om saapo no i korongito dit ongosangod ku! Ingkakat no om tulungai oku no, sabap i kotimbango ot indomo'on Nu.
Umpugo no it ongobansa sid mintutuk Nu, om kuasao no yoti antad sid oogomon Nu do raja sid sorga. Hoturo no yoti antad sid oogomon Nu do Raja sid sorga;  ogom no sid oogomon Nu i sid savat;
Ikau no dino o momisara di sokoviai i riniba. O TUHAN, tahakai oku no do kotimbango, tu yoku diti aso sala.
Pentorono no i kara'atan dit ulun tara'at, om tahakai no do su'ul it ulun dot abanal, tu Ikau no i Kinoringan dot otimbang, kahavol ko di ginavo om pongitungan dot ulun.
I Kinoringan o mongolikup dohon; Yosido no i manapul dioti dit obinsuhut sid Kinoringan.
I Kinoringan o hakim dot otimbang, i soumul mongohukum dit ulun tara'at.
Ong amu sumimban i kabahazano dioti, asaon di Kinoringan i sapadang Dau. Yosido mingat om mongunda di pana Dau.
Onuvon Dau it ongorapo Dau di kapatai, potonguson Dau i ramok i mikit-sikit.
Imatai no i vaza dit ulun tara'at mongitung di kara'atan; mongumba yoti do kounangan om momomusing.
Pata'an yoti do sirangkap sid ulun vokon, topot yoti ogi kondiri o kosulung sino.
Manjadi yoti ohukum di kara'atan dau kondiri, om asaadan di korongito dioti kondiri.
Monorimakasi oku sid Kinoringan tu otimbang Yosido, mindolongoi oku dot indazou sid TUHAN i banalko asavat.

#8
l KOHORMATAN DO KINORINGAN, OM I GUNA DO RINIBA

O Tuhan raja-za, banalko avasi i ngaran-Nu, sid pentongkop do pomogunan,
Sampai sid surga nga mongindazou Dikau.
I munung dit anganak ragang-po om sumusui, nga Ikau-no o momihot do kakansangan.
Tu sumaap di sangod-Nu.
O Tuhan, monikid ong sumirot-oku sid avan om vulan
Om i korimbutuon di ginama di unturu-Nu,
Nga mongitung oku dot nunu-po o kogunaan-Nu, do kakal-ko-po mongohondom ko di riniba.
Sampai manau-nopo dit anganak do riniba.
Ikau-no minamangkat di riniba do tanggungjawab ioti di sokoviai i vinangun-Nu.
Sokoviai i barang do pomogunan nitahak-Nu kavi sid kuasa do riniba.
I sapi om domba om ongodupot sid govuton
Om it ongombolog om it ongosada sid rahat
Om nunu-nopo i suvang do vaig. O Tuhan raja-za, banalko avasi i ngaran-Nu, sid pentongkop do pomogunan.
Sampai sid surga nga mongindazou Dikau.

# 9
PINTADUWA DO MONORIMAKASI SABAP OTIMBANG I KINORINGAN
! Bahagi di maangagazad do kuaya. Isuhut di dolou di Mut-Laben. Zabur di Daud.

O TUHAN, mongindazou oku Dikau dot ensanan i ginavo ku,om monuturan di sokoviai i kosunduvo i ginama Nu.
Mindolongoi oku dot ohigak gima Ikau, om mindolongoi dot indazou Dikau i Banalko Asavat.
Sabap ong kodung mimbulai Ko, sumuri no i sangod ku; kasadu yoti om ahaba sampai apatai.
Ikau no o hakim dot otimbang o pongohoturan, om Ikau no o minanahapan dohon.
Ikau no i minongohukum dit ongobansa dit amu kotutun Dikau, om minominasa dit ulun maangagama dot ara'at; yoti dino amu no pihohondom vagu.
I sangod za natanus no sampai penlaid, Ikau no minongorungoi dit ongokota dioti sampai pinolingan no tantu yoti.
Topot i TUHAN o mangahatul sampai penlaid; Niingkakat Dau it oogomon Dau do raja do mongohukum diti pomogunan.
Otimbang i gama Dau mangahatul di pomogunan, om enizo i gama Dau mangaratu do hukum sid razat.
I TUHAN o sunsudon dit ongoulun di nousiba do pokilikupan di hiza do sid kosusa'an.
O TUHAN, yoti i kotutun Dikau kaasip sid Dikau; isai nopo i rumikot sid Dikau nga amu Nu iduanan.
Indozoho no i TUHAN i mangahatul sid Sion! Pahabaro no i nagama Dau sid ipat-ipat i bansa!
Andaman di Kinoringan yoti it asansara; Amu poolingan Dau it ihad dioti, hukumon Dau it ulun dit orongit o gama sid dioti.
O TUHAN, sianai oku no! Imatai no i sangod ku momogos dohon. O TUHAN sopulai oku no antad sid kapatazan,
supaya kopongindazou oku Dikau sid tinoguvangon dit ongoulun sid Yerusalem. Gumara oku humigak tu nosopulan oku Dikau.
It ongobansa dit amu kotutun Dikau aratu sid luvang dit inukad dioti kondiri. Momurunsut yoti, topot yoti kondiri o nokosulung.
Niintalang di TUHAN i kondiri Dau dot otimbang i gama Dau mangaratu do hukum, it ulun tara'at kosulung di ginama dau kondiri.
Kapatazan o kosungguvo di sokoviai tulun i mangagama dot ara'at, om kaavi it ulun di mangamu-amu do Kinoringan.
It ulun mosikim okonko sampai penlaid do poolingan, om it ulun dot aso banal nunu-nopo okonko sampai penlaid dot aso harapan.
O TUHAN, ingkakat no om rotuai no do hukum it ongobansa. Kada no posimozo'o i riniba do kalabus antad sid hukuman.
O TUHAN, indoronoko no yoti, popurimanai no dioti dot yoti dino baiko riniba.

#10
PINTADUWA MINDAMO DO KOTIMBANGO

O TUHAN, nokuro tu yaddino o kosodu Nu, om sumusut Ko hiza di sid kosusa'an okoi?
I kasavato di ginavo dit ulun tara'at mangaladtak dit ulun mosikim. Yoti dino kosulung di burunsut dioti kondiri.
It ulun tara'at ounsopot dit poniat dioti dot ara'at, om it ulun di mookisusuhul mongolupu om mangamu-amu di TUHAN.
It ulun tara'at amu mangagandang di Kinoringan, tu yoti asavat i ginavo om indoson dioti ong aso Kinoringan.
It tulun tara'at kamanang nopo sid sokoviai i gagama'on dioti. Amu ohorotizan dioti i pongohukuman di Kinoringan. Irak-irakan ogi dioti it ongosangod dioti.
Momoros yoti sid saralom di ginavo dot, “Yokoi diti amu aratu, amu okoi asandatan do kosusa'an,” ka.
It ongoboros dioti noponu do sumpa, vudut om indoronok. Yoti alangkas mongusiba om mangara'at dot ulun.
Sumusut yoti sid ongokampung, om magavang tu mamatai dit ulun dit aso sala. Mongimpa yoti dit ulun dot amu kovogui,
monginud yoti sid sususuton yadko mondou. Monginud yoti dit ulun tokugui, iri ogi tabpa'an om gazaton antad sino.
It ulun dit amu kovogui mikumparan no do nongorodos, notori di korongito.
Ka dit etung dit ulun tara'at, “Posimozo i Kinoringan! Kiumodom i Kinoringan om amu mimot dahai!” ka.
O TUHAN, hukumai no it ulun tara'at! Kada poolingai it ulun nasansara!
Nokuro ma it ulun tara'at tu mongusiba do Kinoringan, om mongitung yoti dot amu hukumon di Kinoringan?
Topot o Tuhan, Ikau dino tantu kemot. Mongontupat Ko di kosusa'an om kapagasan dit ulun, om soumul osodia monulung dioti. It ulun dot amu kovogui patahak sid Dikau di kondiri dau, tu Ikau dino soumul monulung dit ulun tosusa.
Tipuo no i longon dit ulun di momudut om ara'at, hukumo no yoti sabap i korongito dioti do sampai engkod yoti mangagama dino.
I TUHAN o raja do penlaid, om it ulun dit amu kotutun di TUHAN atanus antad sid pomogunan di TUHAN.
O TUHAN, tumbozo'o no it indomo'on dit ulun dot ousiba, tahakai no yoti do kakansangan.
Mongining Ko dit ihad dit usan-usan om it ulun di naladtakan. Mangapad Ko dioti supaya amu no indorosizon vagu dot ulun yoti.

#11
I KEMAZA'AN SID TUHAN
! Bahagi di maangagazad do kuaya. Zabur di Daud.

Kemozo oku do mongolikup dohon i TUHAN. Aso guna do momoros sid dohon dot, “Tulud no sid burul yadko ombolog,
sabap sid otuvong, nounda no dit ulun dot ara'at i pana, tu mamana dit ulun tavantang.
Nunu-nopo nga aso not agama dit ulun tavantang ong kodung nohuzas no i hoturan sid razat,” ka.
I TUHAN sid valai Dau dot Osusi. Yosido kiogomon dot apangkat sid sorga. Yosido mongontupat di sokoviai i riniba om kelo di sagana i gagama'on dioti.
Yosido mongombiri dit ulun tavantang om it ulun tara'at. Yosido dino banalko asana dit ulun di manamod di koburongito.
It ulun tara'at hukumon Dau do kopunavatan, do popou do kisinikit, monirang om barat do kosorob.
I TUHAN otimbang om manamod dit ulun di mangagama dot avantang. It ulun dit otulid i ginavo, kemot om kotutun di Tuhan.

#12
I BOROS DOT ATANTU

Tulungai-no o Tuhan, tu aso-no dlit ulun dot abanal.
Natanus-no i katatapo sid riniba.
Mivuvudut-no ioti do mongolumbok i dila
Topot ong sid saralom do ginavo, tanid-no i pongitungan
Punsoon-no di Tuhan i sokoviai it ongomunung d1 m_omudut
Om it ongodila dit osumbung.
Boros dioti, Ino dila dahai o kokuasaan-za
Om i kabang-za dino, ino-no o sanganu.
Isai-ka o kotori dahai? ka dioti.
Manjadi boros di Tuhan,
Mingkakat-oku-no, sabap nokuasa-no banal it ulun dit osibak
om it ongoulun do mosikim, nga mongohomu-nopo.
Ioku-no o pembulai do kosinangan
bahagi dit ongoulun di nousiba, ka di Tuhan.
Boros di Tuhan, nga boros dot osusi, Iadko i perak di nososob-no sid apui, inturu-no kosusi.
O Tuhan, toudo-okoi-no.
Rindingo-okoi-no antad sid ranzat dino sampai penlaid.

#13
IT ULUN DIT ISESO BANAL

Songkuro-po-ka kalaid, o Tuhan, dot olingan~oku Dikau?
Songkuro-po-ka kalaid do posusut-ko di vuros-nu antad sid dohon?
Songkuro-po-ka koledo dot oruol i ginavo-ku
Sampai humongkob-oku-nopo sodop adau?
Songkuro-po-ka koledo i sangod-ku monori dohon?
Ontupato-oku-no om timpao-oku-no, o Tuhan Kinoringan-ku.
Patarango-no I mato-ku, supaya amu-oku kodop sid kapatazan.
Supaya a-kopomoros i sangod-ku dot; Notori-ku-no ialo, ka dau.
Kopongintomon-no i sangod-ku, tu obinghaba-oku-no gima.
Topot humarap-oku-no sid kovosihan-Nu.
Om i ginavo-ku nga otomon-nopo, sabap i kotulungan-Nu gima.
Mindolongoi-oku-no mongindazou di Tuhan.
Tu nakapangagama-no do kavantangan sid dohon.

#14
I KARA'ATAN DO RINIBA
! Bahagi di maangagazad do kuaya. Zabur di Daud.
It ulun lovong momoros sid ginavo dau dot, “Aso bo Kinoringan,” ka. Yoti kaavi ara'at om i gagama'on dioti banalko ara'at, iso ot ulun nga aso mangagama dot avantang.
Antad sid sorga tumudung i TUHAN di bansa do riniba do mogihim dit ulun dot elo mongitung, ino no it ulun di sumamba sid Dau.
Topot sokoviai it ongoulun di nokolisang om napalid, iso nga aso mangagama dot avantang.
Mongoduat i TUHAN dot, “Okon ka ko sokoviai it ulun tara'at diti nga kelo? Yoti apasi do mangarampas di bansa Ku, om amu insan pintaduwa sid Dohon,” ka di TUHAN.
It ulun tara'at endorosi, tu monulung i Kinoringan dit ulun dit obinsuhut sid Dau.
It ulun tara'at monobon dit umba dit ulun mosikim, topot it ulun mosikim dino likupan di TUHAN.
Harapon dot i kosopulan dit ulun dot Israel rumikot antad sid Sion! Ong pohoturon no vagu di TUHAN i bansa Dau Israel, sokoviai it ulun dot Israel nga tumomon.

#15
IT ULUN DIT APATUT SID TUHAN
! Zabur di Daud.
O TUHAN isai ka o kezon sid valai Nu? Isai ka o kentoron sid Sion i burul Nu dot osusi\f + \fr 15:1: \fq burul Nu dot osusi: \ft Imatai 2:6.\ft*\f* dino?
Ino no, it ulun dit aso kasala'an om i mangagama dot avantang, om it otulid i ginavo momoros dot abanal,
it amu moomitana dot ulun vokon, om it amu mangagama do sala sid koruhang, om it amu mongindara'at di ngaran do sombol,
i mongusiba dit ulun i niada do Kinoringan, topot mongohormat dit ulun dit obinsuhut do TUHAN, i soumul monuluk di janji dioti, dot amu mongitung di korugizan.
Om i pa'angkat dot amu mokibunga, om it amu mookiapil do manala dit ulun dot aso sala. It ulun di mangagama di sokoviai ino, soumul ozom.

#16
IKAU-NO MONUDUK DI RALAN DO KOPOSIZAN

Likupai-oku-no o Kinoringan, sabap Ikau-no o-sunsudon-ku,
Minomoros-oku-no sid Tuhan dot, Ikau-no o Tuhan-ku. Aso-not ikozi-ku tanidko Ikau.
It ongoulun dot osusi sid pomogunan diti o kenginan-ku-no banal. 
Baiko mangamung do kosusaan dau it ongoulun di sumamba do tanidko i Kinoringan.
Amu-oku mamung dioti dino.
Minsanko mangarait dioti, nga amu oku-no.
O Tuhan, nalaba-oku-no dot Ikau-no-o tungkusan-ku
Om Ikau-no monukup dohon.
Nokonong-oku banal dot avantang
O tungkusan-ku di posinang di ginavo-ku.
Mongindazou-oku di Tuhan, I monunda dohon.
Minsanko tanga sodop, ahandamani di ginavo-ku I kovosihan Dau
Soumul-umul elaan-ku dot vozo-vozoon-oku Dau.
Sionggo-oku-nopo, mompok-rompok-ko-no dohon.
Sabab ino otomon-oku om agazo o gama-ku monorima kasih.
Tu elaan-ku-no dot iosido no o mangapad om mongolikup dohon.
Sabap amu-ko paratu dohon sid kapatazan
Om it ongoulun-Nu dut osusi, nga amu-Nu pobinasaon i.
Notudukan-oku-no Dikau di ralan do koposizan. Ohigak-oku, tu sid tinoguvangon-oku-no Dikau.
I palad-Nu do vanan soumul-umul potomon dohon.

#17
PIINTADUWA DIT ULUN DOT ASO SALA
! Piintaduwa di Daud.
O TUHAN iningo no iti gama ku humulu, it indamo ku do kotimbango. Itungo no it ihad ku, iningo no i piintaduwa ku dot otulid.
Ikau no o mangapad dohon, tu Ikau o kelo do nunu ot abanal.
Ikau no o kotutun di ginavo ku. Ong rumikot ko sid dohon do sodop, om mongombiri banal dohon, asot emot Nu sid dohon dot kikenginan tara'at.
Amu oku momoros dot ara'at yadko it ulun vokon, tu sumuhut oku di pinonuhuan Nu, om amu oku mangagama do kokodoho.
Yoku diti soumul sumuhut di tudukan Nu om amu oku kopiti'im sumimpang.
O Kinoringan, mintaduwa oku sid Dikau, tu ambaton oku Dikau, sabap ino, kovili no sid dohon om iningo no it ongoboros ku.
Pematai no i samod Nu di kovongo-vongo, om sopulai no it ulun di sumunsud sid Dikau, tu ong sid toning oku Dikau, osopulan oku antad sid sokoviai i sangod ku.
Likupai oku no do yadko i gama Nu manaud di linsou di mato Nu kondiri. Posusuto oku no sid sahau dit alad Nu,
likupai oku no antad sid ulun tara'at i monginam dohon. Notutukan oku no di sangod ku i mongorungoi di koposizan ku,
yoti dino asavat i ginavo om amu obinsianan.
Gusaon sampai limputan oku dioti, tu mogihim do vaza'an mangaratu dohon.
Yoti dino yadko i mondou, kiivou do monginis-kinis dohon, yadko it anak do mondou i sumusut magavang dohon.
Ingkakat no o TUHAN, saapo no om torio no i sangod ku! Sopulai oku no di sapadang Nu antad sid ulun tara'at.
O TUHAN, sopulai oku no antad sid ulun di mongumpug di harata sid pomogunan. Hukumo no yoti do kapagasan i nosodia Nu no laid do dang dioti, do sampai it ongomuaki dioti nga ohukum-i.
Kemot oku di vuros Nu tu yoku diti aso sala, om kodung oposik oku no, humigak oku no, tu sid toning ku no Ikau.

#18
LONGOI DI DAUD DI KINAMANANGAN DAU
! Bahagi di maangagazad do kuaya. Zabur di Daud it uripon di TUHAN. Linongoi sid TUHAN i hiza di minanapul di Daud i TUHAN antad sid Raja Saul om i sokoviai i sangod dau.

O TUHAN, banalko manamod oku dikau! Ikau no o mangapad dohon.
I TUHAN o mongolikup dohon, Yosido dino yadko it u'ugopon do sojal dit apapag bahagi ku. I Kinoringan ku o moongolikup dohon, apasi oku do kama'a Dau. Mongolikup Yosido dohon yadko kolig, mangapad om manaud Yosido dohon supaya apasi oku.
Mongodim oku di TUHAN it apatut dot indozohon, om manapul Yosido dohon antad sid sangod ku.
Notutukan oku no dot kopunavatan do kapatazan, i lizud do kobinasa'an lumopot sid dohon.
Notutukan oku do kopunavatan do kapatazan, om i lobong pata'an sid dohon do pirangkap.
Sid kosusa'an oku, mongodim oku di TUHAN, mongodim oku di Kinoringan ku tu mokitulung Dau. Mongining Yosido di dolou ku, initung Dau i poongodim ku.
Iri ogi giumuzu om giumugul no i putana'on, i pu'un do burul noguzu om nogugul, gima i hungot di Kinoringan.
Mongolitatabai i lisun antad sid odung Dau, om sumimbulot no lumabus o sinikit dot apui om popou antad sid kabang Dau.
Lapakon Dau it avan iri ogi mindahu Yosido dot kotuvangan o sahau di lapap do hakod Dau.
Alangkas Yosido tumulud do sumako sid malaikat; tumulud Yosido sid timpak dot alad do barat.
Minimbuvut Yosido do kotuvangan, om i mituvong dot akapal mongolimput Dau.
I darun vatu om apui, rumikot antad sid gonit i sid tinoguvangon Dau, lumopuson di mituvong it akapal dino.
Iri ogi pinoungkorud di TUHAN it avan om i Banalko Asavat pinening di dolou Dau.
Vinakas i pana Dau om inunang i sangod Dau, Pinoungkilad Dau i gonit sampai nakatangkus it ongosangod.
I nanad do rahat nembulazan, om i kinoogomo do putana'on nokembulai, di minoniag Ko di Sangod Nu o TUHAN, gima i hungot Nu di nakalabai sid dioti.
Nitivol di TUHAN i longon Dau antad sid savat, kinovidan oku tu minongodong dohon palabus antad sid vaig dot aralom.
Sinopulan oku Dau antad sid sangod ku dot akansang, om antad sid ulun di sumana dohon, tu yoti banalko akansangan oku.
Rinumpak oku dioti di hiza dot osusa oku, topot i TUHAN o minongolikup dohon.
Nilabus oku Dau antad sid kopunavatan, sinopulan oku Dau sabap ozi Yosido dohon.
Sinu'ulan oku di TUHAN tu abanal i gagama'on ku, binarakatan oku Dau tu aso sala ku.
Yoku diti siumuhut di pinonuhuan di TUHAN, amu oku minogidu antad sid Kinoringan ku.
Siumuhut oku di sokoviai i hukum Dau, om amu ku pinosimozo i pinonuhuan Dau.
Ela'an-i Dau do yoku diti aso kara'atan sid tinoguvangon Dau, om minsodu oku nopo antad sid kasala'an.
Manjadi sinu'ulan oku Dau tu mangagama oku nopo dot abanal, sabap ela'an Dau do yoku diti aso sala.
O TUHAN, atatap Ko sid ulun dit atatap sid Dikau, om banalko avantang Ko sid ulun dit avantang sid dikau.
Pinentalang Ko dot osusi i kondiri Nu sid ulun dot osusi, topot kumisangod Ko dit ulun tara'at.
Sinopulan Nu it ulun dit osibak o ginavo, topot ninsibak Nu it ulun dit asavat o ginavo.
Tinahakan oku Dikau do binahang; TUHAN Kinoringan ku o minanganavau di kotuvongo ku.
Minanahak Ko dohon do kakansango kumiumbal di sangod ku,om kuasa do mongolopuson di kuta dioti.
Rinangkap nobo di gama di Kinoringan diti! I boros Dau apatut dot imozo'on. Yosido dino kolig di sokoviai it ulun di mokilikup Dau.
Iso no i TUHAN dino o Kinoringan, baiko Yosido o mangapad ditokou.
Yosido no o Kinoringan i pinakansang dohon om minananus di kopunavatan sid vaza'an ku.
Pakansang Yosido di hakod ku do yadko hakod do tambang, om minanaud dohon sid ongoburul.
Inubas oku Dau mirumpak, supaya kopongolokud oku di pana i banalko ologod.
O TUHAN, Ikau no o monglikup om manapul dohon, nokoronuw oku tu i kotulungan Nu, om i kuasa Nu o minanaud di kosopulan ku.
Minanaud Ko dohon supaya amu oku arakop, om amu kopiti'im oku dot aratu.
Gusaon om tabpa'an ku i sangod ku, amu oku mintoron sampai otori ku yoti.
Bobogon ku yoti sampai amu kotungag yoti, nahaba yoti tu notori sid tinoguvangon ku.
Tinahakan oku Dikau do kakansangan mirumpak, om kamanangan ku sid sangod ku.
Ikau no o kasabap do tumangkus i sangod ku antad sid dohon, binasaon ku it ulun dit asana dohon.
Mongogizak yoti mokitulung, topot isai nopo nga aso manapul dioti, mongodim yoti di TUHAN, topot amu tumimpa i Tuhan.
Huzason ku yoti sampai osiliu dot avu i tilibon do barat, ladtak-ladtakan ku yoti yadko i rapak sid ralan.
Ikau no o manapul dohon antad sid bansa di siuma'ap, om pinajadi dohon do monguasa dit ongobansa, i bansa dit amu ku otutunan nga osiliu-i do razat ku.
I bansa tanid sumingkudou rumonok sid tinoguvangon ku, om sumuhut ong kodung korongou no di hukum ku.
Midu i kosioho dioti, sampai mogkikip no lumabus antad sid kuta dau.
Mizau i TUHAN! Indozoho no i maangapad dohon! Pahabaron no i kasavato di maanapul dohon!
Pinamanang oku Dau antad sid sangod ku, rinakop Dau it ongobansa om yoku no momorinta dioti,
om minanapul dohon antad sid sangod ku.TUHAN, Ikau no o pinamanang dohon antad sid sangod ku, om linikupan oku Dikau antad sid ulun dot orongit.
Manjadi mongindazou oku Dikau sid tanga dit ongobansa,  mindolongoi oku do longoi mongindazou Dikau.
I Kinoringan manahak dot agazo o kamanangan di raja i nopili Dau, tantu manamod Yosido dit ulun i pinangkat Dau, ino no i Daud om i mongkupu dau sampai penlaid.

#19
I KOGOZOO DI KINOURUGAN OM I PINONUHUAN DO KINORINGAN

It avan monuturan di kohormatan do Kinoringan
Om i korimbutuon mangahabal di ginntnn di palad do Kinoringan
It adau keso mangahabal sid adau koduvo di habal dino
Om i sodop keso pazazad sid sodop koduvo di ginama do Kinoringan.
Isot ulun om iso bansa nga aso-no dot a-nokorongou di hal dino.
Om i boros dioti dino, nga tumongkop sid sompomogunan.
I Kinoringan minangagama do valai do pezanan Dau dit adau sitid vinangun.
Supaya it adau dino manganavau di banalko atarang.
Aso-no dot a-nenavahan i navazaan Dau.
I Pinonuhuan do Kinoringan nensanan do manarang om patatap di ginavo.
I kososizan do Kinoringan banalko atantu om pelo dit ongoulun dit obungou.
I hoturan di Tuhan abanal om potomon di ginavo.
I pinonuhuan di Tuhan oliou om posinang di mato.
I boros di Tuhan osusi sampai penlaid.
It undang-undang di Tuhan atantu sampai otulid.
Kihorogo mantadko i nanas dot amas i pinonuhuan dino.
Sampai omis mantadko sorot.
Minsanko ioku nga pinopongohondom banal diti sokoviai
Om it ulun di mihot banal sino, nga osuulan dot banalko agazo
Tu isai-ka o kopurimon dit dau do kinopolidan?
Sabap ino, kada-oku-no hukumai dit amu-ku nopurimanan i nagama-ku.
Rindingo-oku-no sid ongouhin dit aso bahazan,
Supaya amu oku apalid dioti,
Om aso-ogi borotuduon sid dohon.
Sampai aso-no kopolidan-ku.
Gam ozi-ko dit ongoboros-ku
Om i purimon di ginavo-ku, o Tuhan
O Tuhan, i sondihon-ku om i minananggung dohon.

#22
I KOSOPULAN ANTAD SID KOSOMPITAN DOT AGAZO

O Kinoringan, O Kinoringan, Nokokuro-ka, tu iniduan-oku-no Dikau?
Amu-ko-no munulung dohon,
Kinodim-ku Ikau. Topot mininsodu-ko-ogi banal.
O Kinoringan-ku, asasadapan-oku mongodim Dikau, topot aso timpa-Nu.
Om osusuvaban-oku-po do sodop, topot kakali dot aso kosungguvo-ku.
Dot ikau-no o Kinoringan dot osusi.
I Kinoringan dit iindozohon sid longoi dit ongoulun dot Israil. Ikau-no o hinarap dit angaki dahai
Hinumarap ioti dot Ikau-no o manapul dioti.
Ikau-no o kokodimon om palabus dioti.
Minangasip-no ioti sid Dikau sampai amu insan kamalu ioti.
Topot ong ioku diti mad okon-noko riniba.
Mad kutu-no dot uusibaon om gogoukon di kinogumuai dot ulun.
Isai-nopo i kemot dohon, momongerak-no gumauk
Santabiu-no om sompilog-no ioti. Ka dioti;
Ialo-no dino i kasip sid Kinoringan.
Nokokuro-ka, tu amu otulungan iosido?
Ombo-ko i I Kinoringan o manapul dialo dino?.
Banal-no, Ikau-no o minongimbulai dohon.sid tizan  dit idi-ku
Om posinang dohon posusu
Nasanganu-oku-no laid Dikau i kinalandazan-ku, Ikau-no laid o Kinoringan-ku di sid tizan-okui dit idi-ku.
Kada-oku-no insoduai, tu. Sid tanga oku-no di kosusaan, sampai aso-no monulung dohon.
Nourunan-oku-no dit ongotunggal
Om notutukan-oku-no di moriza do Basan.
Sangkabang-no ioti sid dohon do iadko i tiakan i vitilon i mondou.
Iadko vaig-oku di nouza.
Om mad nongotatak-no laid it origotulang-ku antad sid ongopiuhalan
I ginavo-ku noudou-no iadko i rilin.
Nokorop-no om asara-no i kakansangan-ku.
Kinumapit-no sid ngahad i dila-ku, om niopung-oku-no Dikau sid lisovu do naraka.
Nourunan-oku-no dot asu om noliiriputan-oku-rio di bahanan do mangarampas
Noboludan-no aioti i longon. om hakod-ku.
Ezapi ot tigagang-ku.
Sumonsob-no kavi ioti dohon.
Bibobohogizan-no dioti i sulung-ku.
Om pitataanan-no dioti i kurilib-ku.
Topot kada-oku insoduai o Tuhan.
Tulungai-oku-no koduruk, o kakansang dohon.
Apadai-oku-no antad sid ongosapadang di sangod-ku
Om apadai-no i ginavo-ku antad sid linouban dot asu.
Sopulai-oku-no antad sid.kabarig do mondou .
Om sid ongosangau do moriza. Nambat-oku-no dikau o Tuhan.
Poronu-oku-no di ngaran-Nu sid ongoobpinai-ku.
Om indozohon-ku-no ikau sid tanga do piumpugan.
Indozoho-no dikou i Tuhan, ot ongoulun. di mongoguna di Tuhan.
Pogohormat-kou-no di Tuhan, ot ongomongkupu di rurungan di Yakub.
Pinta dua-kou-no sid Tuhan, ot ongoulun dot Israil. Sabap amu kumihi iosido dit osibak. 
Om amu posimozo iosido dit kapagasan dit ulun di popogoson.
Amu tolikudan Dau ioti,
gam iningon Dau i gama dioti mokitulung.
Sabap ino, mongindazou-oku:no di Tuhan sid tinoguvangon di piumpugan dot agazo
Om tulukon-ku i nazir-ku sid tinoguvangon di sokovial it
ongoulun di mongindazou Dikau.
Envizahan it ongoulun dit olomi o-ginavo
Mongindazou-no it-ongoulun:di mogihim di Tuhan.
Ali-ali om osinang ioti sampai pen laid.
Ot ongobansa, hondomo-no dikou i Tuhan.
Ot ongobansa, toronong-kou-no sumamba sid tinoguvangon Dau.
Sabap i Tuhan, ino-no o raja
Iosido-no o mangahatul di sokoviai it ongobansa. 
O banal-no. Iosido-no o sambaon :dit origosusumbung sid
pomogunan.
Sumingkudou-no kavi sid tinoguvangon Dau i kipinuhobo om i nengkono-no.
Sumamba kavi it ongoturun-inonurun sid Dau, Om pahabal-no di Tuhan it anganak dino.
Ioti-no o mangahabal di kotulido
Om i kogozoo di ginama di Tuhan Sid ongobansa di mimbulai-ogi tohudi't adau.

#23
I TUHAN IT AVANTANG O PANAUD

I Kinoringan o manaud dohon. Aso-not ihimon-ku.
Niodop-odop-oku Dau sid orombung o sakot
Om niatod-oku Dau sid vaig dot oliou.
Nempanggalan dau i koposizan-ku
Om inovit-oku Dau sid ralan dot abanal, sabap gima i ngaran Dau.
Bang-mamanau-oku sid orintup om-otuvong-po; 
Amu-oku-no rumosi dot indorosi,
Tu Ikau-no i mozo-vozo dohon.
I babambang-Nu om i tungkat-Nu ino-no o harapan-ku.
Ikau-no o mangahatul do meja bahagi-ku sid tinoguvangon di sangod-ku
Om Ikau-no o mongumau dit obuk-ku dot umau
Om tinunguw-Nu-i ponginuman-ku sampai nakalabai.
Manjadi i kovosihan om i kosianan-Nu mozo-vozo dohon suvab-suvab. 
Om mintoron-oku sid valai do Kinoringan sampai penlaid.

#24
SUMUVANG SID PANAMBAYANGAN

Kinoringan sanganu diti pomogunan diti om i sokoviai I suvang.
O ino-no iti pomogunan diti om I sokoviai I pentoron sid savat.
Sabab nengkakat-no Dau sid rahat
Om tinatap-no Dau sid soribau do vaig.
Isai-ka I katakad sid burul do Kinoringan?
Om isai-ka I kengkakat sid intoronon dot osusi?
O ino-no it ulun dit aso sala I palad dau
Om osusi I ginavo dau
It amu oviton I ginavo dau sid aso tantu-tantu
Om it amu sumumpa sid vudut.
Manjadi iosido-no o kotorima di barakat antad sid Kinoringan.
Om I kabanaran di Tuhan di minanapul dau.
Iti-no I bansa di ulun di mogihim di Tuhan.
Ino-no I mogihim di tinoguvangon-Nu, o Tuhan di Yakub.
Posongoho-no I navaon
Om pasavato-no I rongobon di pomogunan
Supaya kosuvang I raja di banlko asavat.
Isai-ka I raja di banalko asavat?
Ino-no I Kinoringan it akansang om kikuasa.
Posongoho-no I navaon
Om pasavato-no I rongobon do pomogunan.
Supaya kosuvang I raja di banalko asavat, Isai-ka I raja di banalko asavat?
Ino-no I Kinoringan, I monguasa di kinasapahan do malaikat.
Tu iosido-no I raja di banalko asavat.

#42
IT ULUN DI NARAKOP LUMANGAD DO KINORINGAN

Iadko I tambang di mongivou dot ovud
Pengkaa-no dino I kotilangad di ginavo-ku Dikau, o Kinoringan-ku
Tuliohon-no do Kinoringan I ginavo-ku, I Kinoringan di kapapasi.
Sera-no o kotoguvangan-ku sid Dikau, o Kinoringan.
Inakanon-ku-no I romou-ku sodop adau
Sabab asasadapan do piduduat-oku dot ulun dot,
Siombo-no-ka I Kinoringan-nu? Ka.
Manjadi ong andaman-ku I hiza diri, banalko mungkolu I ginavo-ku
Tu andaman-ku-no I sambazaai-okoi-po kumaa sid valai do Kinoringan
Do songlongoi-longoi mongindazou om monorima kaseh I kinasapahan di hiza dot adau dot agazo.
Nokukuro-ka, tu iadino o kolungui-nuo, ginavo-ku?
Nokukura-ka tu oupus-ko banal?
Harap-no sid Kinoringan, tu kakal-okui mongindazou Dau
Gima I sokoviai o kotulungan dit antad sid tinoguvangon Dau.
Lumungui-no I ginavo-ku, tu mungkolu mongohondom Dikau, o Kinoringan-ku
Sabap it uningou do gumbang antad sid Yarden om antad sid Hermon
Mititimpa-no I pusod do rahat rumidi
Om I kolokoi do murulun di vusoi-Nu
Om nibabandung-no o gumbang di Tuhan monodos dohos.
O Tuhan, asasadapan-ko manamod dohon.
Osusuvaban I longoi do koruhunan-Nu o longozon-ku
Om pomintaan dua-ku sid KInoringan, I mamasi dohon. 
Boros-ku sid Kinoringan, I sondihon-ku, Nokokuro-ka, tu iadino o kolungui-nu, o ginavo-ku?
Nokokuro-ka, tu oupus-ko banal?
Harap-no sid Kinoringan, tu kakal-okui mongindazou Dau.
Gima I sokoviai I kotulungan dit antad sid tinoguvangon Dau.
Iadko notobok-oku do kapatazan
Agauk-oku dit ongosangod-ku dot ino-no o bonoroson dioti suvab-suvab sid dohon,
Siombo-no-ka, I Kinoringan-nu? Ka.
Nokokuro-ka, tu upus-ko banal?
Harap-no sid Kinoringan, tu kakal-okui I mongindazou Dau
Gima I sokoviai I kotulungan dit antad sid tinoguvangon Dau.

#43
BANARO OKU NO KINORINGAN

Banaro-oku-no Kinoringan
Banaro-oku-no o Kinoringan
Patarango-no banal I kabanaran-ku sid tinoguvangon dit aso bahazan.
Sopulai-oku-no antad sid ongobansa di momudut om ongoraraat
Sabab I kakansango-ku, Ikau-no o Kinoringan.
Nokuro-ka, tu niada oku-no?
Nokuro-ka, tu opogos-oku di gotipon-oku dit ongosangod-ku?
Porikoto-no sid dohon I kanavau om I kabanaran-Nu.
Supaya agazad-oku om ovit-oku sid burul dot osusi.
Om sid valai dit inintoronon-Nu
Om kotoronong-oku sid meja-Nu, tumoguvang sid Dikau
do monundatang mongindazou Dikau.
O Kinoringan di kotomon om kohigak dohon.
Nokokuro-ka, tu iadino o kolungui-nu, o ginavo-ku?
Nokokuro-ka, tu opus-ko banal?
Harap-no sid Kinoringan, tu kakal-oku I mongindazou Dau.
Banal-no. A-milo-milo mongindazou-oku-nopo Dikau,
O Kinoringan-ku, I manapul dohon.

#51
I GAMA MINDAMO DI KAADAAN DO SALA

Sianai-oku-no o Kinoringan, sabap gima i koruhuan-Nu
Om sabap gima i kosianan-Nu di mangapus di sokoviai I kasalaan-ku.
Vougai-oku-no, supaya edu i karaatan-ku
Om susio-oku-no antad sid dusa-ku
Sabap ioku diti mangakun di sokoviai i kasalaan-ku
Om i dusa-ku soumul-umul sid tinoguvangon-ku.
Rontob sid Dikau o kisala-oku.
Nakaranggal-oku di kenginan-Nu.
Atarang-no dot abanal ino gama-Nu mongohukum.
Om otulid i hukum-Nu
Sabap inusu-oku sid karaatan
Om inotizan-oku dit idi-ku sid dusa.
Banalko ozi-ko do kipurimon do kabanaran i ginavo dot ulun
Om nitanda-Nu-no laid sid dohon i keloo-Nu.
Hugusai-oku-no, supaya ajadi-oku dot oborosi
Vougai-oku-no, supaya ajadi-oku dot osusi.
Porongoho-oku-no vagu do kohigakan om katamanan
Pohijaho-oku-no, supaya kopongindazou-oku vagu Dikau.
Takapai-no i karaatan-ku
Om tonuso-no i kasalaan-ku.
Umbosihai-no i ginavo-ku
Om imvoguvai-no di Sundu-Nu I purimon do ginavo-ku.
Kada-oku-no padao sid tinoguvangon-Nu
Om kadan-no onuvo I Sundu-Nu dot osusi, I nokositi-no dohon
Pogulio-no sid dohon i kohigakan
Gima i kosopulan antad sid Dikau
Om sukupo-no di ginavo-ku dot obinsuhut.
Manjadi ioku-no o monuduk di ralan-Nu sid ongoulim di mangagama do sala.
Supaya it ulun do kidusa kouli sid Dikau.
O Tuhan, tindalo-oku-no antad sid kiraha i palad-ku.
O Kinoringan di puun do koposizan, .
Supaya i dila-ku kendazou di sokoviai i kabanaran-Nu.
O Tuhan, buka-no i kabang-ku.
supaya i dila-ku kendazou Dikau.
Sabap amu-ko engin ong mangagaras-oku do pangazam om isamba sid Dikau
Tu ong-engin-ko ogi do iadino, tan tu mangagaras-oku-no.
Topot amu-ko engin.
Ino-no it isamba di kenginan do Kinoringan, I ginavo dot okugui I ginavo dot osibak om obingrosi
Ino-no ot amu-Nu kihizon, o Kinoringan.

#73
KAKALI MOZO-VOZO OKU DIKAU

I Kinoringan dino banalko avasi sid ulun dot Israil
Om sid ulun dit osusi i ginavo dau.
Topot ioku diti, ogos-ogos ong kasadu i-hakod-ku
Om ogos-ogos-po ong kokinsal iti rampam-ku.
Tu oruol I ginavo-ku dit osiratan-ku I kosinangani dit ulun dot osumbung.
Ohijau om olomu iosido, sabap amu opionong do kosusaan do iadko it ulun vokon. 
Om amu opipogos do iadko it ulun vokon.
Ipokindazou dioti j kosumbungo dau
Iringgal-no i gama momogos do koruhang.
I korusuko dioti dino kapalid sid kasalaan.
Om i karaatan do ginavo dioti iadko lampai do linusuvon.
Mongusiba om.momudali om momuruvak om mongindorosi ioti dit ongoulun dot. oholian banal
Pokitatalanan dioti it avan
Om tilaan dioti i putanaon.
Sabap ino, i kogumuai dot ulun iadko murulun o vaig momozo dit ulun dot araat.
Boros dit osumbung, Siombo ot elaan do Kinoringan ino? ka, om,
Okonko pioontupat di banalko asavat iti? ka.
Iadno dino it ongoulun dot araat
Lumundu-no ioti om osinang-no sitid pomogunan.
Bang iadino, porosuma i gamo-ku monusi di ginavo-ka?
Om momoug dit uhomon-ku sid kabanaran?
Tu konoruvo-nopo dot adau, nga onong-oku do kapagasan
Om suvab-suvab-no dot osusa-oku.
Ogos-.ogos-po ong ioku nga kopomoros do iadino,
Nga kopongimpulong-oku di ranzat dit anganak-Nu o Kinoringan.
Topot banalko nangangaban-oku di hiza di tipangaharati-oku dara
Sampai sinumuvang-oku sid valai do Kinoringan do mongontupat di kosungguvo dioti. Nelaan-ku-no dot,
Ikau-no pinentoron dioti sid pansung dit aralamou
Om Ikau-no o momulid dioti sid kobinasaan.
It ongoulun dlino tigogi orungoi
Om sokoviai tigogi avi dot obinasa.
Mad minonginipi di mad tinumanusi o hinondom, Tu noposik-po, nolingan-no kavi.
Kodungko himbok it oruol i ginavo-ku. Iadnoko vuvundukon
Om iadko lovong om bobou-oku
Om i kobuatano-ku nga iadnoko du pot sid tinoguvangon-Nu
Topot kakali do mozo-vozo-oku-nopo Dikau
Om Ikau nga kovidan-Nu-i i palad-ku do vanan.
Ikau-no i monunda dohon
Om sid kopupusan-po torimaon-oku-no Dikau sid kohormatan
Ong nokovozo-ko-no dohon, amu oku-no mindamo do nunu nopo sitid pomogunan sampai sid surga.
Tu mulongko atanus I guvas om i ginavo-ku
Kakali dot Ikau-no o monginsasamod dohon
Om Ikau-no o tungkusan-ku sampai penlaid, o Kinoringan.
Na isai-nopo i mogidu antad sid Dikau, ino-no o tumanus.
Om tonuson-Nu kavi it ongoulun di tumolikud sid Dikau.
Topot ong ioku, ozi-oku tumopiri sid Dikau.
Humarap-oku sid dikau, o Tuhan Kinoringan, om koronu-ku-ogi nongogama-Nu.

#90
RINIBA OBIMPASA, TO POT ONG KINORINGAN SAMPAI PENLAID

O Tuhan Ikau-no o sunsudon-za antad di kodori-po.
It amu-po nongurug it ongoburul
Om it amu-po nagama i tana om i riniba,
Ikau-no o gulu banal om amu-ko tumanus sampai penlaid
Pouli-ko di riniba sid lisovu do tana dot, Uli-kou-no o riniba, ka-Nu
Sabap ong sid Dikau soribu toun iadko sangadau-no
Om iadko sonsodop-no dit osuvaban dot amu kodop.
I riniba iadko i gama-Nu pasak do lampai do lizud
Ioti dino iadko rontob inipi. 
I riniba koluu di sakot,
Tu sumuni om mungkalad-no do sasarap,
Minsosodop-po lumondihu-no om rumuzou-no.
Tumanus-okoi, sabap i hungot-Nu
Sampai tigogi obinasa-okoi, sabap i sana-Nu.
Sokoviai i kasalaan-za, nigili-Nu-no kavi sid tinoguvangon-nu
Om i karaatan-za di nokosusut-no,
Nga nakalanta kavi sid tinoguvangon-Nu.
Sabap ino, kisukud-okoi, tu atanus okoi di hungot-Nu.
I konibako dit umul-za iadko insan no pomuhopo.
Manjadi i sukud-za turu-no nopod toun.
Bang anaru-naru o sukud, nga valu nopod toun.
Mulongko ava tang o kavazao, kakali dot opogos om osusa
Sabap toduru-duuruk om katalib i sukud-za,
Topot isai-no-ka i kelo di kasanaan-Nu?
Om isai-no i kootupat di kohungan-Nu?
Tudukai:-okoi-no mongitung di kisukud-okoi
supaya elo-okoi monguog.
O Tuhan, kadan-po kiponginud dot alaid-no.
Uli-no sid dahai. Sianai okoi-no o Tuhan.
Sukupo-okoi-no di kovosihan-Nu suvab-suvab.
Supaya otomon-okoi om ounsopot-okoi sampai matai.
Higako-okoi-no do kerad-di kosusaan-za. . . .
Suliai-no it ongotoun di varo kinapagasan dahai.
Pemoto-okoi-no di gama-Nu
Om it anganak-za, nga kemot-po di kohornatan-Nu.
O Tuhan, Kinoringan-za, lindungo-okoi-no di kovosihan-Nu.
Berkatai-no it agama di palad-za, o Tuhan, Om hoturo-no i gagamaon-za suvab-suvab.

#93
I TUHAN O RAJA DO PENLAID

I Tuhan ino-no o raja.
I pakazan di Tuhan, ino-no i pangkat Dau.
I kolopindang Dau, ino-no I kokuasaan Dau.
Om amu-no gumuzu it origi do pomogunan, tu pinihot Dau.
Opihot-no liad I kinogomon di karajaan-Nu, o Tuhan.
Ikau-no o gulu-no banal.
O Tuhan, kumohud-no it ongogulonggong dot olungan.
Sokoviai it ongoolungan ngan monguningou-no I kohud do gulonggong.
Sokoviai it olungan, sumurut-no banal I kohud do gulonggong
Topot I Tuhan lobi-po ahakang mantadko I murintal I gumbang
Om lobi-po mantad it uni do rinidi do rahat.
I hoturan-Nu atantu sampai penlaid.
Om I kosusio-Nu ot umpakai di valai-Nu,
O Tuhan dit apasi penlaid.

#95
MONGINDAZOU DI TUHAN

Tokou-no, mongindazou di Tuhan
Gunao tokou-no i pampang di koposizan tokou.
Sumamba tokou-no sid tinoguvangon Dau, tu monorima kaseh
Mindolongoi tokou-no do torima kasih sid Dau.
I Tuhan, ino-no i raja do keso om banalko apangkat.
I Tuhan, ino-no i Kinoringan i kipangkat.
I konopuan do pomogunan, sid palad kavi di Tuhan.
Om it ongoburul nga iosido-no o sanganu.
I rahat nga i Tuhan o sanganu, sabap iosido-no o minongurug,
Om i putanaon, nga inurugi Dau.
Siti-kou-no tumoronong tokou-no sid tinoguvangon Dau om sumingkudou-ogi
Tu mangarazou tokou di Tuhan, i minongurug di tokou.
Sabap iosido-no i Kinoringan tokou
Om i tokou-no i bansa di tinaud Dau.
Iadko i bahanan do domba di tinunda di longon Dau.
Biano pongining-kou-no om pangasip-kou-no di boros do Kinoringan:
Kada-no pokodoho i ginavo dikou iadko i hiza di sid Meriba
Om iadko i hiza di sid pampang Masa sid belantara.
Tu i hiza diri minoguhang it angaki dikou dohon sampai minonuba dohon.
Nemot-no i gama-ku, nga amui kasip ioti.
Apat nopod tinounan dot opogos-oku lumanut dino bansa-ku
Sampai nokoboros-oku-no di hiza diri dot,
Ioti-no dino o bansa dit amu atantu.
Amu kaharati ioti sumuhut di vazaan-ku, kangku.
Sabap ino, nokoboros-oku-no sid saralom di hungot-ku dot,
Amu kosuvang ioti sid intoronon-ku, kangku, ka di Kinoringan.



#98
I TUHAN DI SOMPOMOGUNAN MONUNDA DI BANSA DAU

Mindolongoi tokou-no do longoi vagu sid tinoguvangon di Tuhan.
Sabap nokembulai-no di Kinoringan i kosunduvo dau.
I palad Dau do vanan om i longon Dau dot osusi
O minongimbulai di gama dot osundu.
I Kinoringan o minanarang di kotulungan Dau
Sampai minongimbulai di kabanaran Dau sid tinoguvangon di sokoviai i bansa.
Kakali andaman Dau i kovosihan
Om i katatapo Dau sid rurungan dot Israil.
Pentongkop do pomogunan nga nokemot-no kavi di gama do Kinoringan monulung di tokou.
Tomon-kou-no, ot ongopomogunan, sabap i Kinoringan.
Higak-kou-no banal om pindolongoi-kou-no.
Sundatango-no dikou i gama mongindazou do Kinoringan
Dot ologod o gama monundatang om mindolongoi.
Ponuling-kou-no om ponuburi-kou-no
Tu mongindazou sid tinoguvangon do raja, ino-no i Tuhan
Gara-kou-no, o rahat om i sokoviai i suvang-nu.
Gara-kou-no o vinangun sampai i suvang-nu.
Panapap-kou-no ot ongobavang
Om gara-kou-no mindolongoi, ot ongoburul sid tinoguvangon di Tuhan.
Tu rumikot-no iosido.
Rumikot i Tuhan, to mongohukum-no di pomogunan.
Manahak-no iosido do kovosihan Dau sid riniba
Om i kotulido Dau sid ongorurungan.

#100
BANSA TOKOU DI TUHAN

Ot ongopomogunan, pongindazou-kou-no di Tuhan.
Samba-kou-no sid Tuhan dit otomon-kou.
Rikot-kou-no sid tinoguvangon Dau dot ounsopot i ginavo dikou.
Hondomo-no dikou i Tuhan, o ino-no i Kinoringan.
Iosido-no o minongurug di tokou
Om i tokou diti, nga i Tuhan-no o sanganu.
I tokou-no o bansa Dau
Iadko it ongodomba di tinaud Dau.
Suvang-kou-no sid ongonavaon di valai do Kinoringan tu monorima kaseh.
Rikot-kou-no sid natad do panambayangan, tu mindolongoi do torima kaseh sid Dau.
Sabap avantang i Tuhan
Om i kovosihan Dau nga amu-no engkod sampai penlaid,
Om i kotulido Dau mintoron sid ongoulun gulu
Sampai tungkus-monungkus i ranzat.

#103
I POMINTAAN DUA DO MONORIMA KASIH

O ginavo-ku, pangarazou di Tuhan
O koposizan-ku, pangarazou di ngaran Dau dot osusi.
O ginavo-ku, pangarazou di Tuhan
Om kadan-no poolingai i kinoponulungan Dau.
Nakada-no Dau i sokoviai i kasalaan-ku
Nengkod-no Dau i sokoviai it oruol-ku
Natanggung-no Dau i koposizan antad sid kobinasaan.
Napakazan-oku-no Dau di kovosihan om kosianan Dau.
Nosukup-no Dau i kenginan-ku
Nemvoguvan-no Dau i kansang-ku iadko i ombolog bugang.
I Tuhan mongimbulai di katapatan om kabanaran sid sokoviai it ongoulun di kukudomuson.
Nokentahan-no laid Dau sid di Musa it oumba Dau dino.
Om it ongoulun dit Israil, nga nokemot-no kavi di nagama Dau.
Asamod om avasih i Tuhan
Alanut iosido om ogumu o kovosihan Dau.
I hungot Dau okonko sid penlaid
Om i pajal Dau nga okonko sampai said kopupusan do riniba
I gama do Kinoringan monuli okonko isusui di kasalaan tokou
Om amu posuli iosido di karaatan tokou.
Sabap iadko kasavato ditit avan antad sid tana
O kogozoo di kovosihan Dau di panaud dit ongoulun di sumuhut.
Iadko i kosoduo do kosilahon antad sid kotonobon
O gama do Kinoringan pensodu di karaatan tokou.
Iadko kosomoko dit ama sid anganak dau
O kobinsianan di Kinoringan sid ongoulun di sumuhut sid Dau.
Sabap elaan-no gima di Tuhan i buatan tokou
Om andaman di Tuhan dot i tokou iadko lisovu
Sabap it umul do riniba iadko sakot
Om iadko it ongovusak sid govuton.
Tu otongus-no di barat dot alasu, atanus-no i vusak
Sampai aso-not andaman Dau dino.
Topot ong i kovosihan di Tuhan dino, amu engkod sampai penlaid.
Om i kabanaran Dau nga atantu sampai sid muaki.
Ino-no i sokoviai it ulun di sumuhut di janji do Kinoringan.
Om it ongoulun di mongohondom di pinonuhuan do Kinoringan sid saralom di gagamaon dioti.
I Tuhan kiogomon dot opihot sid surga
Om i karajaan Dau nga mangahatul sid pentongkop.
Ot ongomalaikat, pangarazou-kou-no di Tuhan.
Suhuto-no dikou i kovosihan Dau.
Ot ongomononsiou, pangarazou-kou-no di Tuhan
Ot ongouripon di Tuhan, suhuto-no dikou i kenginan Dau.
O vinangun, pangarazou-kou-no di Tuhan, sid siombo-nopo o karajaan Dau.
O ginavo-ku, pangarazou-no di Tuhan.



#117
MONGINDAZOU DO KINORINGAN

Ot ongorurungan, pangarazou-kou di Tuhan.
O sokoviai it ongobansa, pongindazou-kou di Tuhan.
Sabap akansang i hoturan di kovosihan Dau sid di tokou
Om I kabanaran di Tuhan mangahatul di tokou sampai penlaid.
Pangarazou-kou-no di Tuhan.

#121
I TUHAN O MOZO-VOZO

Tumimpan-oku sid ongoburul. Siombo-no-ka i monulung dohon?
Aso, o ino-no iso-no, i Tuhan i minongurug dit avan om i tana.
I Tuhan monunda dikau, supaya amu kotongkihal i hakod-nu.
I manaud dikau, nga amu tiodopon.
Tantu amu duduon do tiodopon i manaud dot Israil.
I Tuhan, ino-no i manaud dikau.
I Tuhan mozo-vozo dikau mongodundung ponong sid vanan.
Ong it adau, nga amu-ko surukanon antava i vulan di sodop.
I Tuhan manaud dikau, supaya a-ko onong di sokoviai i karaatan.
Iosido o manaud do koposizan-nu.
I Tuhan manaud di pamanahan-nu di mantadi
Om i muli-ko-no, biano sampai penlaid.

#126
MOKITULUNG SID TANGA DO KOSUSAAN

I hiza di pinouli-okoi-no di Tuhan sid burul do Sion
Mad rontob iadko monginipi o kopurimonon dahai.
Banalko ohigak-okoi om otomon-okoi-no mongindazou di hiza diri.
Gamko it ongobansa vokon nga minomoros-no dot,
Banalko agazo o nagama di Tuhan sid dioti dino, ka.
Manjadi banalko agazo o nagama di Tuhan sid dahai.
Sabap ino, otomon-okoi-no.
O Tuhan, ulito-no vagu i kosurupu dahai
Iadko i gama-nu momonu di vaig dit ongopaluh sid belantara
I mamarabag-no o romou mogihad di hiza di mananomi,
Nga ozizi-ogi ot irak ong mongimot-no.
Mogihad ioti di hiza do mamanau-ogi mangasok,
Topot aramai ioti di hiza di muli-no antad sid minongulok.

#127
I BARAKAT DO KINORINGAN O PUUN DO KOSINANGAN

Ong okonko i Tuhan kondiri o pengkakat do valai
Tantu porosuma i gama dit ongotukang muvalai.
Ong okonko i Tuhan kondiri o manaud do kuta,
Tantu porosuma i gama dit ongosojal manaud do kuta.
Porosuma i gama dikou tumungag dot osopung-po do suvab,
Sampai alalangan do sodop do posurut dit ongogamaon dikou.
Om mangakan di nouval o longon dikau monimbaru.
Tu i modo-modop i sinamadan di Tuhan o kasanganu.
It anganak, tinungkusan antad di Tuhan.
Om i rumanzat nitahak di Tuhan.
Kiontok i kakansango dit anganak dino sid ama dioti,
Iadko it ongoramok sid palad di mononsiou.
Osinang-no it ulun di noponu do ramok i karaban
Tu amu-no endai iosido tumoguvang di sangod dau.

#130
POMINTAAN DUA SID KOTUVANGAN

Sid kosusaan-ku mongodim-oku Dikau o Tuhan.
Iningo-no i dolou-ku, o Tuhan.
Pataano-no i tolingo-Nu, to mongining di dolou-ku dit osusa-oku.
Bang mongohondom-ko di kasalaan-ku
Isai-po it abanal sid tinoguvangon-Nu?
Topot sid Dikau-no i kaadaan do sala.
Supaya ohormat-ko di sokoviai.
Humarap-oku-no Dikau, o Tuhan
Humarap i ginavo-ku sid Dikau.
Sampai monginud-oku di boros-Nu.
I ginavo-ku humarap di Tuhan
Lobi-po ko it ongomanaud di monginud di kosilahan dit adau.
Banal, lobipo ko it ongomanaud di monginud di kosilahan dot adau.
Ot ongoulun di Israil, inud-inudai dikou i Tuhan.
Sabap i kovosihan di Tuhan
Om ogumu i kotulungan Dau.
Sampai iosido o palabus dit ongoulun dot Israil antad sid sokoviai i kasalaan dioti.

#137
KORUDU DI NARAKOP SID BABEL

I songogom-ogom-okoi sid timbang do bavang sid Babel diri
Do songihad-ihad-po, to mungkolu dit andaman dahai i Sion.
Nipingsiit-za-no it ongosundatang-za sid ongokazu sid timbang do bavang
Tu banalko amu-okoi-no engin monundatang om manangkung.
Ginaratan-okoi-no di minangarakop dahai do monguni dit unizon do rumamai
Om pinopindolongoi-okoi-no dit ongosangod dahai siti di longoi do Sion.
Kurozon-za-ka mindolongoi i kendazou di Tuhan, ong sid pomogunan-okoi dit ulun vokon?
O Yerusalim, suhul-no ong kumimai i vanan-ku ong olingan-ku ikau
Suhul-no ong sumokot i dila-ku sid ngahad-ku ong engkadan-ku ikau mihohondom, o Yerusalim
Antava varo-po tiozi-ku mantadko ikau.
O Tuhan, hondomo-no i gama dit ongoulun dot Edom
Di hiza di kinotorian di Yerusalim diri dot,
Ginumara-no ioti momoros dot.
Patanao-no banal it ongokavavalazan dino, ka dioti dino.
Ot inuvung do Babel, i minongorungoi-no di sokoviai di Yerusalim,
Osinang-no it ulun di kapangarakop dit anganak-nu
Sampai ilapos sid ongopampang mongoruta.

#139
KOTUTUN I KINORINGAN DI KOBUATANO-KU MANTADKO IOKU KONDIRI

O Tuhan, Ikau-no o mongimpuras dohon
Om kelo di kobuatano-ku
Mogom-oku antava mingkakat-oku, nga elaan-Nu i.
Ohorotizan-Nu i pongitungan-ku dit osodu-ko sid dohon.
Mamanau-oku antava modop-odop-oku, mozo-vozo-koi dohon
Tu mongontupat-ko di sokoviai i vazaan-ku
Sabap nunu-nopo i boros-ku, amu-po kalabpu, elaan-Nu no.
Ikau-no mongolimput dohon
Om i palad-Nu nga ikama-no sid dohon.
Nunu-nopo gamaon-nu dot osundu, amu-oku katalahas-ino iadino.
Mogidu-oku sid sodu, kakali sid saralom-oku di Sundu-Nu
Siombo-nopo i polombusan-ku, kakali sid tinoguvangon-Nu.
Ong mindakod-oku sid avan, nga sori koid avan
Modop-odop-oku sid naraka, nga sori-koid naraka
Tumulud-oku mozo di kosilahon, tu rumikot-oku sid rahat di banalko osodu,
Tantu sori-no i palad-Nu mangagazad oin monunda dohon.
Bang momoros-oku dot,
Mokituvong-oku tu mintoron-oku sid otuvong, kangku,
Tantu it otuvong dino anavau iadko adau,
Sabap sid Dikau i sodop iadko adau.
Sabap Ikau-no o minongurug di guvas um ginavo-ku
Ikau-no o minangaluk dit ongokobuatano-ku kakal-okui sid tizan dit idi-ku.
Monorima kaseh-oku sid Dikau, sabap arangkap banal ino gama-Nu mongurug dohon.
I sokoviai i ginama-Nu, nga tatanid, tu kisundu-nopo.
Nopurimanan-ku banal sokoviai ino.
Izap-izapon-Nu i tulang-ku di lumoput-oku-ogi sid rondom sid paganakan dit idi-ku.
Notutunan-oku-no laid Dikau dit amu-po naluk-oku do bizahat sid tizan dit idi-ku
Om nokotimbagos-nu-no laid i konoruvo dit sukud-ku dit amu-po nakalata i mato-ku sid pomogunan.
Amu-ku asansad humarati i pongitungan-nu, O Kinoringan
Tu amu-no milod kiroon.
Ong izapon-no ogumu mantadko i pantai,
Suvab-suvab ong oposik-oku-po, Ikau-nopo o piohondom-ku
Sampai asot elaan-ku do rontob.
O Kinoringan, binasao-no it ongoulun dot araat
Om sunsubo-no pensodu inot ongomangazou.
Pokoraat-nopo dikou ioti, o Tuhan
Om mongusok-nopo di ngaran-Nu
Asana-oku banal dit ongoulun di sumana Dikau o Tuhan
Mad mikokot-no i ginavo-ku mongitung dit ongoulun di sumaap Dikau.
Banalko otogod-oku dioti, ioti-no o kasanaan-ku.
O Kinoringan, impurasai-oku-no om intutunan-no i ginavo-ku
Porisao-oku-no sampai horotizai-no i pongitungan-ku
Om imatai-no i vazaan-ku.
Tu kabambol-oku dati do karaatan. Om tudukai-oku-no di vazaan sid penlaid.

#146
I KINORINGAN MANGAPAD DIT ULUN DOT OKUGUI

Haleluya, Pongindazou-kou-no di Tuhan
O ginavo-ku, pongindazou-no di Tuhan
Sampai pempatai-ku mongindazou di Tuhan
Ong kakal-oku-po kopomuhobo
Kakali mindolongoi-oku mongindazou di Kinoringan-ku.
Kada-kou-no kiharap sid momodlundu
Sabap aso kapamasi ong sandadi riniba
Ong matai-no ioti jumadi do lisovu
Om i nongorancang dioti nga mozo-no tumanus
Osinang-no it ulun dit otulungan di Kinoringan di Yakub
Om osinang-no it ulun di humarap sid Tuhan
I Kinoringan i minongurug dit avan om i tana
Om i rahat om i sokoviai i suvang Dau,
I monunuluk di najanji-no Dau.
I mononzupo di rurugizon
Om povivizau di monombitil
Om palabus (monoruntud) di nokotorungku.
Posisirot di bolou
Om mongimpanggol di ginavo do naratu
Om mananamod dit ulun dot abanal.
Mononzupo dit ongopanambat om usan-usan
Om bituanon it ondu do kikihizon.
Topot ong i ralan dit ulun dot araat, tonuson Dau..
Tomon-no o Sion, to i Tuhan Kinoringan o raja-nu, Do turun-monurun sampai penlaid.

#148
IT AVAN OM TANA NGA MONGINDAZOU DI KINORINGAN

Haleluya, Pongindazou-kou-no di Tuhan
Pongindazou-kou-no di Tuhan, ot avan
I pentoron sid savat, nga pongindazou-kou-no kavi di Tuhan
Pangarazou-kou-no di Tuhan ot ongomalaikat
Pongindazou-kou-no di Tuhan ot ongosojal do surga
Pangarazou-kou-no di Tuhan, ot adau om vulan
Pangarazou-kou-no di Tuhan, ot ongokorimbutuon
Pangarazou-kou-no di Tuhan, ot ongokoungan dot avan.
Pongindazou-kou-no di Tuhan, ot ongovaig sid koungan.
Pongindazou-kou-no kavi di Tuhan,
Tu i boros Dau o kinojodizan do varo-kou dino.
Hinatul-no kavi Dau ioti dino sid Dau om Dau do kinintorono.
Vinolit-no Dau laid i pangarantaban dit amu-no milod sumborolizan.
Pongindazou-kou-no di Tuhan, o sokoviai i vinangun
Pangarazou-kou-no di Tuhan, o suvang do pomogunan
Pangarazou-kou-no di Tuhan, o rahat om sada dit ongogagazo
Pangarazou-kou-no di Tuhan, o gonit om darun dit a-mabak.
Om i borizu di ponuhu Dau.
Pangarazou-kou-no di Tuhan, ot ongoburul om ompulongon
Ot ongokouvaan om himbaan.
Pangarazou-kou-no di Tuhan, ot ongopangazam om mizontalun, ot ongoombolog om momomondoi.
Pangarazou-kou-no di Tuhan, ot ongoraja om ongobansa ot ongomontiri om kiongokuasa
Pangarazou-kou-no di Tuhan, ot ongondu om ongokusai
Pangarazou-kou-no di Tuhan, ot ongosukod om anganak-po.
Mongindazou tokou-no kavi di Tuhan.
Tu iosido-no i katalib di sokoviai.
Iosido-no o mangahatul dit avan om pomogunan.
Iosido-no o pakansang di bansa Dau, i rurungan dot Israil di sinamadan Dau.
Iosido-no o piindazou dioti sampai penlaid.
Haleluya.

#150
SOKOVIAI MONGINDAZOU DI TUHAN

Haleluya.
Pangarazou-kou di Kinoringan sid valai Dau
Pangarazou-kou di Kinoringan sid pomogunan Dau di nolimput.
Pangarazou-kou di Kinoringan, gima agazo i kotulungan Dau.
Pangarazou di Kinoringan, sabap gima i pangkat Dau.
Pangarazou-kou di Kinoringan do mindolongoi om monguni.
Pangarazou-kou di Kinoringan do monundatang.
Pangarazou-kou di Kinoringan di monuling om monompoton.
Pangarazou-kou di Kinoringan di mongurali om manangkung.
Pangarazou di Tuhan, o Vinangun di mizaui.
Haleluya.